Ոլորտ գույնի

կարմիր երազ

Երազ կարմրավուն պոչով գիսաստղի մասին,

երազ կարմիր թուշիկներով ագռավի մասին,

որ կարմիր իրերն է կտցահարում,

կարմիր որդեր անկյունում,

հողից կարմիր թել են ստանում ու հյուսում

ողնաշարին իրենց բոսորագույն,

կարմիր երաժշտության ձայներ՝

գույնից բորբոքված օդում,

կարմիր մոլորակն իր վրայից թափ է տալիս գույնը,

կարմիր աքլորականչ ու որսորդի զրույց կարմիր․

կարմիր ուրուներ առանձնատներում ապրող․

կարմիր ծակծկոցներ ոտնաթաթերիդ․

երազ կարմիր վիհի մասին։

կանաչ արկղ

Ներսում լիքը սուլիչներ,

կանաչ դե մինոր,

հատակին փշրած կեղևներ,

կանաչ էգ թռչուն․

թևերն անզոր թափահարում է ու ձյուն բերում,

կանաչ մարգարեություն՝ հենված արկղին,

ճտքակոշիկներով կանաչ հրեշ․

բերանը բացուխուփ է անում ու մրմնջում, թե որքան հեռու է հրեշանոցը,

բերանից կանաչ անձրևանոցներ են թափվում

ու արկղից դուրս գալիս՝

կանաչ ծավալով լցված արկղից։

դեղին հեքիաթ

Դեղին վերմակի մեջ փաթաթված արքայադուստր

դեղնած ձայնալարերով,

դեղին զարդատուփ՝ անկողնուց ճոճվող,

ներսում՝ արքայի փտած ոսկորներ

միմյանց հետ կռվող ,

դեղին պատերազմ ներսում,

պատից կախված դեղնավուն փերի՝

լեզուն դուրս է հանել,

նախկին անեծքներից վանկերն իրար միացրել,

չորացած փայտիկն էլ առաջ է բերել․

կախարդում է։

կապույտ համոզմունք

Մանկության մետաղյա ձող,

հյուսիսային քամուց օրորվում է,

ձողի ներսում՝ ջրի կապույտ մարմին,

երազների հոսքն անցնում է ջրի մարմնի միջով

դեպի գլխավոր երակը քնի,

ջրային երազ

թաց երազ,

մանկության կապույտ ննջարան,

կապույտ փեշերով մաման

օրորոցն է կարգի բերում,

օրորոցի ներսինը՝

գիտակցության մյուս կողմում

խորտակվում է ջրի մարմնի մեջ

սպիտակ խորան

Բևեռում՝ խորքից տատանվող խրճիթ,

ներհայեցողություն,

խրճիթը՝ շրջապատված սպիտակ բնությամբ

մառախուղ՝ լցված խրճիթի փայտե երախում,

եղյամ՝ աչքերի շուրջը,

սպիտակ հոգոց՝ խրճիթից լսվող,

սառցե կտորներով պատրաստված դամբարան,

ձյան խրթխրթոցի ձայն,

սպիտակ մորթի ունեցող բևեռախույզը

մոտեցավ խրճիթին,

տեսավ ձյան աղբյուրը․

երկնքին խառնված սպիտակ խորան։